Höfuðstöðvar Eftirlitsstofnunar EFTA.

Fram kemur á vef ESA að samþykkið fyrir ríkisaðstoðinni sé tímabundið og háð því skilyrði að íslensk stjórnvöld leggi fyrir ESA nákvæma áætlun um endurskipulagningu sjóðsins fyrir septemberlok 2011.

Framlag ríkisins er veitt til að viðhalda eigin fé Íbúðalánasjóðs og gefa sjóðnum færi á að afskrifa tiltekin íbúðalán.

Per Sanderud, forseti ESA, segir á heimasíðu stofnunarinnar, að það sé fyrst og fremst íslenska þjóðin sem njóti góðs af aðgerðinni, þar sem framlagið komi viðskiptavinum Íbúðalánasjóðs til góða með afskriftum íbúðalána þeirra.  

Vísað er til þess, að frá því fjármálakreppan skall á á Íslandi í október 2008 hafi fjöldi heimila lent í greiðsluerfiðleikum með íbúðalán og sé íbúðarhúsnæði í sumum tilvikum yfirveðsett. Til að bregðast við þessu hafi ríkisstjórn Íslands ásamt öllum lánveitendum íbúðalána nýverið tekið höndum saman um að lækka tiltekin íbúðalán í 110% af virði hins veðsetta íbúðarhúsnæðis.

„Virði eigna Íbúðalánasjóðs mun minnka verulega vegna ofangreinds samkomulags lánveitenda. Að óbreyttu myndi það hafa í för með sér verulega lækkun eiginfjárhlutfalls Íbúðalánasjóðs og ætti hann á hættu að verða ógjaldfær. Hafa íslensk yfirvöld því ákveðið að leggja sjóðnum til nýtt fé til að koma í veg fyrir hin neikvæðu áhrif, einkanlega með vísan til þess hlutverks sjóðsins að fjármagna sig á íslenskum fjármálamarkaði með skuldabréfaútgáfu. Þessi aðgerð hefur það markmið einnig að koma í veg fyrir skaða annarra aðila á markaði og íslensks efnahagslífs í heild," segir í tilkynningu ESA.