Japanska þjóðin glímir nú við þær mestu hörmungar sem riðið hafa yfir landið í áratugi. Reuters

Síðastliðinn mánudag hóf Rauði kross Íslands söfnun vegna jarðskjálftanna í Japan, en allt það fé sem safnast mun renna beint til Rauða krossins þar í landi. Með því að hringja í númerið 904 1500 má gefa 1.500 krónur sem dragast af símreikningi.

Í tengslum við söfnunina hefur verið komið á viðamiklu samstarfi „Vina Japans“ en hópurinn samanstendur af fjölda einstaklinga af japönskum uppruna á Íslandi, ásamt fulltrúum Félags Japansmenntaðra á Íslandi, Íslensk-japanska félagsins, sendiráðs Japans á Íslandi ásamt fjölmörgum öðrum Íslendingum sem tengjast Japan á einn eða annan hátt. Markmið hópsins er að vekja athygli á söfnun Rauða krossins með ýmsum hætti. 

Sjálfboðaliðar frá Vinum Japans verða í Kringlunni á föstudag milli klukkan 14 og 19 og í Smáralind milli klukkan 11 og 18 á laugardag. Hópurinn mun kynna átakið og ræða ástandið í Japan við gesti og gangandi. Einkunnarorð átaksins er japanska hvatningin „Ganbare Nippon“ sem útleggst á íslensku sem „ekki gefast upp Japan“. Með þessum hvatningarorðum sýnum við samstöðu með japönsku þjóðinni.

Samstöðuviðburður í Hinu Húsinu á laugardag

Á laugardaginn milli klukkan 13 og 17 verða Vinir Japans með samstöðuviðburð í Hinu húsinu. Japanir búsettir á Íslandi hafa fundið fyrir miklum hlýhug á undanförnum dögum og langar í þakklætisskyni að bjóða alla velkomna í Hitt húsið þar sem ýmislegt verður í boði - bæði fyrir börn og fullorðna. Gestir munu geta kynnt sér þætti í japanskri menningu, brotið Origami trönur, lært japanska skrautritun og tekið þátt í að koma hvatningarskilaboðum áleiðis til íbúa Tohoku svæðisins og japönsku þjóðarinnar allrar.

Nánari upplýsingar um átakið er að finna á Facebook-síðu hópsins.