Jóhanna Sigurðardóttir forsætisráðherra segir að auka þurfi fjárfestingar á Íslandi úr 13% af landsframleiðslu í 18-20%. Þetta þýði að fjárfestingar þurfi fara úr 200 milljörðum í 275 milljarða á tveimur árum.

Bjarni Benediktsson, formaður Sjálfstæðisflokksins, sagði á Alþingi í dag að fjárfesting á Íslandi væri um 150 milljörðum minni en hún ætti að vera miðað við stöðugleikasáttamálann sem gerður árið 2009 og ríkisstjórnin stóð að. Hann sagði að ríkisstjórninni hefði mistekist að laða fram fjárfestingar í atvinnulífinu. Hún hefði með skattastefnu sinni og með því að skapa óvissu í grunnatvinnugreinar eins og sjávarútveg og orkuiðnað stuðlað að minni fjárfestingu. Fyrirtæki í sjávarútvegi treystu sér ekki til að ráðast í fjárfestingar vegna óvissu um framtíð greinarinnar.

Jóhanna sagðist deila áhyggjum manna af því að hagvöxtur væri hér of lítill og fjárfesting væri of lítil. Fjárfestingar á síðustu tveimur árum hefðu verið um 13% af landsframleiðslu, en við þyrftum á næstu tveimur árum að ná henni upp í 18-20%. Þetta væri erfitt verkefni en alls ekki útilokað að það tækist. Jóhanna sagði hins vegar ósanngjarnt að miða fjárfestingar við það sem var í gangi fyrir hrun. Þá hefðu fyrirtæki ráðist í bólufjárfestingar sem ekki hefði verið grundvöllur fyrir.

Sigmundur Davíð Gunnlaugsson, formaður Framsóknarflokksins, gagnrýndi efnahagsstefnu ríkisstjórnarinnar harðlega. Hér væri pólitísk óvissa, skattar væru hækkaðir, stefna í grunnatvinnuvegunum væri í óvissu, hótað væri þjóðnýtingu í orkuiðnaði og ráðherrar færu á svig við lög við að reyna að ná fram stefnu sinni. Allt dragi þetta úr líkum á að fyrirtæki væru tilbúin til að ráðast í fjárfestingar.

Sigmundur Davíð gagnrýndi sérstaklega yfirlýsingar efnahags- og viðskiptaráðherra sem hefði lýst íslensku  efnahagslífi í samtölum við erlenda fjölmiðla með þeim hætti að hér yrðu áfram gjaldeyrishöft og krónan væri ónýtur gjaldmiðill. Á sama tíma segði fjármálaráðherra að krónan verði hér um ókomin ár.

Jóhanna sagði nær fyrir Sigmund Davíð að lýsa stefnu sinni í efnahagsmálum frekar en að bölsótast út í ríkisstjórnina. Hún spurði hver væri stefna Framsóknarflokksins varðandi afnám gjaldeyrishafta, upptöku evru, aðild að Evrópusambandinu og s.frv. Stjórnarandstaðan bæri líka ábyrgð og ætti að lýsa stefnu sinni ekki síður en ríkisstjórnin.

„Þetta er ekki hægt," sagði Sigmundur Davíð og bætti við að forseti Alþingis yrði að útskýra fyrir forsætisráðherra hvað fælist í starfinu. „Hæstvirtur forsætisráðherra veit ekki af því við hvaða starfi hún hefur tekið. Hæstvirtur forsætisráðherra er ekki lengur fyrrverandi ráðherra í stjórnarandstöðu sem getur komið upp í pontu til að skammast í öllum öðrum. Nú þarf forsætisráðherra að fara að taka ábyrgð og upplýsa almenning um hvernig hún ætlar að leiða þjóðina út úr vandanum. Ekki koma hér aftur og aftur og spyrja stjórnarandstöðuna: Hvað viljið þið?"