Sjúkrabíll flutti fólkið á sjúkrahúsið á Akranesi. mbl.is/Júlíus

Tveir voru fluttir á sjúkrahús á Akranesi eftir að jeppi og fólksbifreið rákust saman á Akrafjallsvegi rétt fyrir kl. átta í morgun. Að sögn lögreglu er um lítilsháttar meiðsl að ræða.

Lögreglan segir að ökumaður fólksbifreiðarinnar, sem er af gerðinni Toyota Yaris, hafi misst stjórn á henni í hálku þegar hann sveigði fram hjá öðrum bíl sem var kyrrstæður við vegkantinn, en sá bíll var bilaður. Við það rakst Yaris-bifreiðin á jeppann sem kom á móti. Segir lögregla mildi að báðir bílarnir hafi ekki verið á mikilli ferð.

Ökumaður og farþegi voru í jeppanum, sem er af gerðinni Nissan Patrol, og var farþeginn fluttur á slysadeild ásamt ökumanni Yaris-bifreiðarinnar, sem var einn í bílnum. Hann hafði ætlað að veita ökumanni bifreiðarinnar sem var við kantinn aðstoð þegar slysið varð.

Bílarnir skemmdust nokkuð í árekstrinum.