Hálka er víða um land. Rax / Ragnar Axelsson

Lægð kemur upp að landinu vestanverðu í kvöld, en éljagangur hefur verið þar á slóðum í dag að sögn veðurfræðings hjá Vegagerðinni.

Á Suður og Austurlandi verður suðvestanátt og snjókoma í fyrstu, en svo hlánar og úrkoman breytist í slyddu upp úr miðnætti. Rigna tekur í nótt á þessum slóðum og hvessir þegar líða tekur á nóttina. Aðstæður á vegum í svona hitabreytingum geta orðið varasamar þegar úrkoma fellur sem slydda og síðar rigning ofan á þjappaðan snjó.

Á norður og austurlandi snýst vindáttin til norðausturs með snjókomu og lélegu skyggni víðast hvar í nótt, en þó verður að öllum líkindum úrkomulítið á Vestfjörðum. 

Ófært um Öxnadalsheiði

Hálka er víðast á Suðurlandi. Hálka er á Sandskeiði og Hellisheiði og hálkublettir í Þrengslum.

Á Vesturlandi er éljagangur og hálka. Hálka og skafrenningur er á Holtavörðuheiði en snjóþekja og éljagangur á Bröttubrekku og hálkublettir á Laxárdalsheiði. Á Vestfjörðum er hálka, snjóþekja og skafrenningur. Hálka er á Steingrímsfjarðarheiði og hálkublettir á Þröskuldum.

Á Norðvesturlandi eru hálkublettir og skafrenningur. Hálka og skafrenningur er á Vatnsskarði og snjóþekja og skafrenningur á Þverárfjalli. Á Norðausturlandi er ófært og óveður á Öxnadalsheiði sem og á Ljósavatnsskarði. Hálkublettir og skafrenningur á Siglufjarðarvegi. Þæfingsfærð og skafrenningur er á Hólasandi. Hálka eða hálkublettir er á flestum öðrum leiðum.

Á Austurlandi er snjóþekja og skafrenningur á Möðrudalsöræfum og Vopnafjarðarheiði. Hálka, snjóþekja og skafrenningur er víðast hvar. Á Suðausturlandi er hálka.