Tveir menn í svörtum bíl reyndu að lokka tvo drengi úr Engjaskóla í Grafarvogi til sín í fyrradag. Að því er kemur fram í Fréttablaðinu neituðu drengirnir að fara með mönnunum.

Er þetta í   fjórða sinn á tveimur vikum sem tilkynning berst um að menn á svörtum bíl reyni að fá börn inn í bílinn.

Björgvin Björgvinsson aðstoðaryfirlögregluþjónn sagði við Morgunblaðið í vikunni, að verið væri að safna upplýsingum um málin. Allir lögreglumenn sem væru á ferðinni um höfuðborgarsvæðið hefðu fengið lýsingar á bílum og meintum gerendum í þessum tilvikum og mundu hafa augun hjá sér. 

Áður hefur verið tilkynnt um atvink við Húsaskóla í Grafarvogi á föstudaginn var. Ókunnugir menn á svörtum bíl buðu þá ungum dreng að skoða Legó í bíl þeirra. Hann afþakkaði boðið og lét foreldra sína vita sem gerðu skólanum viðvart. Skólayfirvöld sendu foreldrum ábendingu vegna málsins. Í henni sagði m.a. að bíllinn hefði verið svartur og mennirnir tveir. Annar þeirra með yfirvaraskegg og mjóan hökutopp.

Svipuðum bíl og mönnum sem svipar til lýsingarinnar úr Grafarvogi var lýst í Garðabæ í byrjun þessa mánaðar. Þá reyndu tveir menn að lokka átta ára dreng upp í bíl til sín við Stjörnuvöllinn. Þeir buðust til að sýna drengnum fótboltadót.

Reynt að lokka stúlkur

Einnig var tilkynnt um atvik í Hafnarfirði og Breiðholti í síðustu viku þar sem reynt var að lokka ungar stúlkur upp í bíl með dökkum rúðum. Stúlkurnar sem voru á Suðurgötu í Hafnarfirði voru um átta ára en stúlkan í Breiðholti á unglingsaldri. Þá var tilkynnt atvik við Laugardalshöll þar sem dreng var boðið upp í bíl. Í tilvikinu við Laugardalshöll náðist bílnúmer. Þegar málið var kannað fékkst eðlileg skýring á því að dreng var boðið þar upp í bíl. Maður sem var að sækja syni sína á íþróttaæfingu og var með þá í bílnum bauð ókunnugum dreng far vegna þess hvað veðrið var vont