Gestum var leiðbeint hvernig þeir gætu skrifað kveðjur til Japans með japönsku letri. Kveðjurnar voru síðan hengdar á tré. mbl.is/GSH

Margir lögðu leið sína í Hitt húsið í miðborg Reykjavíkur í dag til að sýna Japönum samstöðu í þrengingum þeirra vegna náttúruhamfaranna í síðustu viku.

Rauði krossinn á Íslandi hóf sl. mánudag söfnun vegna jarðskjálftans og flóðbylgjunnar, sem fóru yfir Japan og í tengslum við söfnunina hefur verið komið á viðamiklu samstarfi vina Japans hér á landi, bæði Íslendinga af japönskum uppruna og öðrum sem tengjast Japan. Er markmið hópsins að vekja athygli á söfnun Rauða krossins með ýmsum hætti.

Hópurinn stóð í dag fyrir samstöðuviðburði í Hinu húsinu þar sem kynnt var sýnishorn af japanskri menningu. Þar gátu gestir brotið Origami trönur, lært japanska skrautritun og tekið þátt í að koma hvatningarskilaboðum áleiðis til íbúa Tohoku svæðisins og japönsku þjóðarinnar allrar.

Að sögn þeirra, sem skipulögðu viðburðinn hefur margt fólk komið í húsið í dag og tré, sem gestir gátu hengt kveðjur til Japans, var orðið fullt nú síðedgis. Verða kveðjurnar síðan sendar til Japans.