Byggingarsvæðið í Úlfarsárdal. mbl.is/Golli

Héraðsdómur Reykjavíkur hefur hafnað kröfum nokkurra einstaklinga um að þeir fái að skila lóðum í Úlfarsárdal í Reykjavík og að Reykjavíkurborg endurgreiði þeim verð, sem greitt var fyrir byggingarrétt.

Um er að ræða lóðir, sem boðnar voru út í fyrsta áfanga íbúðarbyggðar í nýju hverfi í suðurhlíðum Úlfarsfells árið 2006. Í útboðsskilmálum sagði, að um væri að ræða sölu á byggingarrétti en ekki á lóðunum sjálfum og að gerður yrði leigusamningur um lóðirnar eftir almennum reglum. 

Um er að ræða fjögur mál þar sem þess var krafist að Reykjavíkurborg greiddi á bilinu 19-30 milljónir til baka í hverju máli. 

Í niðurstöðu héraðsdóms segir m.a. að í gögnum um fyrirhugað skipulag á svæðinu sé því lýst með almennum orðum en engu lofað um að uppbyggingu hverfisins í heild eða að hluta yrði lokið innan tiltekins tíma enda ekki á valdi Reykjavíkurborgar að tryggja það.

Hvorki deiliskipulagið né önnur gögn gefi heldur fyrirheit um að uppbygging gatnakerfis, skóla, íþróttamannvirkja, leiksvæða og annarrar opinberrar þjónustu innan hverfisins yrði að fullu lokið áður en einstakir lóðarhafar lykju við framkvæmdir á lóðum sínum. Hafi kaupendur byggingarréttar því ekki getað vænst annars en að hraði uppbyggingar þessarar þjónustu í hverfinu héldist að miklu leyti í hendur við fjölgun íbúa þess sem aftur myndi ráðast af getu einstakra lóðarhafa til að ljúka byggingarframkvæmdum á lóðum sínum.

Því fellst héraðsdómur ekki á að Reykjavíkurborg hafi vanefnt skyldur sínar gagnvart kaupendunum á þann hátt að þeim  sé heimilt að rifta kaupunum á byggingarréttinum og krefjast skaðabóta.

Þá hafi ekki verið sýnt fram á að borginni sé lagalega skylt að taka við lóðunum og byggingarrétti sem þeim fylgi og endurgreiða kaupverðið.