Maðurinn var í hópi erlends göngufólks en meiddist og gat ekki haldið ferðinni áfram. mbl.is/Rax

Björgunarsveitarmenn á vélsleðum frá Höfn sóttu slasaðan göngumann í skálann á Grímsfjalli í dag. Sleðamennirnir lögðu af stað með manninn til byggða um tvöleytið í dag. Reiknað er með að þeir verði komnir að bílum sem bíða þeirra um fjögurleytið.

Liðsmenn Björgunarfélags Hornafjarðar fóru á jökulinn í morgun á þremur jeppum og fjórum vélsleðum að sækja manninn. Þeir óku upp Skálafellsjökul og þaðan í Grímsvötn.

Vont færi er fyrir jeppana á jöklinum að sögn stjórnstöðvar Björgunarfélags Hornafjarðar en vélsleðarnir komust hraðar yfir. Maðurinn var á göngu á jöklinum í níu manna hópi  þegar hann datt í gær og meiddist á fæti. Í morgun treysti hann sér ekki til að halda göngunni áfram.

Gönguhópurinn hélt ferð sinni áfram í dag og ætlaði á Hvannadalshnjúk. Maðurinn sem meiddist beið björgunarmanna í skálanum á Grímsfjalli. Búið var um hann á sleða sem dreginn er af vélsleða.

Maðurinn verður fluttur á heilsugæslustöðina á Höfn í Hornafirði þar sem meiðsl hans verða skoðuð og að honum hlynnt.