Sjallinn á Akureyri. Skapti Hallgrímsson

Eigandi skemmtistaðsins Sjallans á Akureyri hefur verið dæmdur í 400 þúsund króna sekt fyrir brot á lögum um brunavarnir.  Eldgleypir var að skemmta í húsinu í febrúar í fyrra þegar slökkviliðsstjórinn á Akureyri kom í eftirlitsferð.

Fram kemur í dómnum, að þegar slökkviliðsstjórinn á Akureyri skoðaði eldvarnir hússins að beiðni lögreglu, kom í ljós margir ágallar á brunavörnum. Til dæmis hafði neyðarútgangur á suðaustur horni hússins verið skrúfaður fastur og aðrar flóttaleiðir voru ýmist bilaðar, eða hindraðar með stólum, bjórkútum, snjó o.fl. og slökkt hafði verið á brunavarnarkerfinu.

Eigandinn játaði sök. Sagði hann fyrir dómi, að hann hefði ekki verið á staðnum þetta kvöld og ekki vitað hvernig þá hefði verið staðið að eldvörnum.  Eins hefði hann ekki vitað að þetta kvöld hefði eldgleypir skemmt í húsinu.  Þá hefði verið orðið við öllum kröfum slökkviliðs um úrbætur og því verið lokið á örfáum dögum. Kæmu eldvarnareftirlitsmenn reglulega á skemmtistaðinn.  

Dómurinn segir ekki unnt að líta fram hjá því að alvörumál sé að reka skemmtistað, þar sem þess megi vænta að gestir séu meira og minna ölvaðir, og standa þannig að brunavörnum eins og gert var umrætt kvöld.  Skipti þar mestu að neyðarútgangur var skrúfaður aftur og komi  fram í gögnum málsins að þegar slökkviliðsstjóri athugaði málið á vettvangi þessa nótt, tókst honum ekki að sparka upp hurðinni, þótt hann reyndi.  

„Alvarleiki málsins minnkar ekki þegar horft er til þess að meðal skemmtiatriða í húsinu umrætt kvöld var eldgleypir," segir í dómnum.