Formlega krafist nýrra kosninga

Einn af frambjóðendunum við hinar ógiltu stjórnlagaþingskosningar hefur formlega krafist þess að kosningin verði endurtekin. Áskilur hann sér rétt til að krefjast skaðabóta úr ríkissjóði ef ekki verður fallist á kröfu um uppkosningu.

„Það er mín bjargfasta trú að uppkosning er eina lögmæta leiðin eftir að framkvæmd kosninganna var úrskurðuð ógild,“ segir Sigurður Aðalsteinsson á Vaðbrekku á Jökuldal um kröfu sína til innanríkisráðuneytisins.

Sigurður bendir á að í lögunum um stjórnlagaþing er vísað til almennra kosningalaga um þau atriði sem ekki er tekið á þar. Þar sé skýrt að kjósa skuli aftur, ef kosningar eru úrskurðaðar ógildar, og á það hafi margsinnis reynt í sveitarstjórnarkosningum.