mbl.is/Ernir

Sóley Tómasdóttir, borgarfulltrúi Vinstri grænna, furðar sig á rýrum svörum borgarstjóra um fjárhagslegan ávinning fyrirhugaðra sameininga leikskóla, grunnskóla og frístundaheimila. Skrifleg greinargerð frá sviðum borgarinnar veki upp fleiri spurningar en hún svari. 

„Hagræðingin hlýtur að hafa verið reiknuð út með kerfisbundnum hætti og útreikningarnir hljóta að liggja fyrir í þar til gerðum töflum. Kjörnir fulltrúar og borgarbúar allir eiga heimtingu á að útreikningarnir verði gerðir aðgengilegar, enda mikilvægt að hægt sé leita svara við eftirfarandi spurningum á einfaldan hátt,“ segir í spurningum sem Sóley lagði fram í borgarráði í dag. 

Sóley segir svar meirihlutans við fyrri fyrirspurn sinni um málið, frá 10. mars sl., hafi borist í dag. Sú fyrirspurnin var svohljóðandi:

„Borgarráðsfulltrúi Vinstri grænna óskar eftir sundurliðuðum upplýsingum um þá hagræðingu sem á að nást, verði fyrirætlanir um sameiningar leikskóla, grunnskóla og frístundaheimila að veruleika. Óskað er eftir sundurliðun og útskýringum á öllum þeim tölum sem settar eru fram í töflu á bls 9 í skýrslu starfshóps um greiningu tækifæra.“

Sóley segir að svar meirihlutans, sem sjá má í viðhengi að neðan og lagt var fram á fundi borgarráðs í dag, sé vægast sagt rýrt. Þar komi engar tölur fram eða útreikningar, heldur aðeins skrifleg greinargerð frá starfsfólki fagsviða borgarinnar.

Í framhaldinu lagði Sóley fram spurningar í mörgum liðum. Hún segir brýnt að meirihlutinn svari því hvernig hagræðingin eigi að nást fram. Tregða meirihlutans veki upp spurningar um hvort útreikningarnir hafi farið fram yfir höfuð, eða að þeir séu jafnvel byggðir á röngum og/eða villandi upplýsingum.
 

Sóley Tómasdóttir, borgarfulltrúi VG. mbl.is/Eggert