Ísland leikur hlutverk í bjartri framtíð norðurslóða

Þrátt fyrir að Íslendingar kunni að vera svartsýnir um framtíðarhorfur um þessar mundir er full ástæða til bjartsýni, ef marka má spá landfræðingsins Laurence Smiths um aukið vægi norðurhvels jarðar í heimsbúskapnum á næstu áratugum.

Smith segir í samtali við viðskiptablað Morgunblaðsins í dag, að hentug staðsetning Íslands í Norður-Atlantshafi geri það að verkum að landið geti gegnt miklu hlutverki í samgöngum á hafsvæðinu. Reykjavík geti verið eitt þeirra hafnsvæða sem sjái fram á mesta aukningu í skipaumferð á næstu áratugum.

Smith hefur öðlast heimsfrægð eftir útkomu bókar hans um framtíðarhorfur norðurhvels jarðar. Hann heldur fyrirlestur í Þjóðminjasafninu á morgun, föstudag.