Borgarráð samþykkti í dag tillögu Jóns Gnarr borgarstjóra um að stofnaður verði fimm manna stýrihópur á vegum Reykjavíkurborgar og Faxaflóahafna sem er ætlað að endurskoða skipulag við höfnina frá Grandagarði að tónlistar- og ráðstefnuhúsinu.
Hópnum er ætlað að taka afstöðu til legu og útfærslu Mýrargötu.
Hann á einnig að taka afstöðu til fyrirliggjandi áætlana, marka sýn til
framtíðar, undirbúa endurskoðun skipulagsvinnu á svæðinu og hafa
yfirumsjón með framgangi hennar. Tillögur að endurskoðuðu skipulagi
svæðisins á að vinna í samráði við hafnarstjórn, skipulagsráð og
umhverfis- og samgönguráð, auk hagsmunaaðila og íbúa. Með stýrihópnum
starfa skipulagsstjóri, hafnarstjóri og sviðsstjóri umhverfis- og
samgöngusviðs ásamt samgöngustjóra. Gert er ráð fyrir að
stýrihópurinn skili tillögum sínum eigi síðar en 1. september 2011.
Samþykkt var að skipa eftirtalda í hópinn: Hjálmar Sveinsson, formaður, Páll
Hjaltason, Hólmfríður Ósman Jónsdóttir, Gísli Marteinn Baldursson og
Júlíus Vífill Ingvarsson.