Séð í vesturátt frá skálum Jöklarannsóknarfélagsins á Eystri Svíahnjúk á Grímsfjalli. Magnús Þór Karlsson

Björgunarfélag Hornafjarðar er nú á leið upp Skálafellsjökul á þremur jeppum og fjórum vélsleðum að sækja slasaðan göngumann í skálann í Grímsvötnum, samkvæmt tilkynningu Slysavarnafélagsins Landsbjargar. 
 
Maðurinn, sem var á ferð með níu manna hópi í göngu á jökli, féll og slasaðist á fæti í gærkvöldi. Um klukkan hálf tíu í morgun barst svo beiðni um að hann yrði sóttur. Talið er að hann sé illa tognaður eða fótbrotinn. Gönguhópurinn hyggst halda ferð sinni áfram.
 
16 björgunarsveitamenn taka þátt í aðgerðinni. Reiknað er með að þeir komi til göngufólksins milli klukkan tvö og þrjú í dag.

Skíðagöngufólkið er frá Belgíu og ætlar að halda áfram austur yfir Vatnajökul, að sögn stjórnstöðvar aðgerða á Höfn í Hornafirði. Ágætis færi er á jöklinum en lítið skyggni, snjómugga og 8-10 m/s vestanátt. Veðrið á að versna í kvöld eða nótt. 

Fólkið hafðist við í skálanum á Grímsfjalli í nótt.