Hlutfall unga í rjúpum sem veiddar voru í fyrra var 75%, samkvæmt greiningu Ólafs K. Nielsen, rjúpnasérfræðings Náttúrufræðistofnunar. Hlutfalll unga í veiddum fuglum lækkaði frá fyrra ári á Vesturlandi, Suðurlandi og Austurlandi.
Alls var Ólafur búinn að greina 5.031 væng, samkvæmt tölvuskeyti hans til rjúpnaveiðimanna o.fl. Hann fékk um 89% af þeim fjölda vængja sem barst í fyrra. Sömu menn senda honum vængi á hverju hausti og má því draga þá ályktun að rjúpnaveiðin hafi verið ívið minni haustið 2010 en hún var 2009.