Lögreglan mbl.is

Nokkur erill var hjá lögreglunni á höfuðborgarsvæðinu í nótt. Afskipti þurfti að hafa af tveimur minniháttar líkamsárásum, annarri í miðborginni en hinni í Grafarvogi. Þá var töluverður fjöldi gesta skemmtistaðarins Re-Play á Grensásvegi undir aldri, eða alls um tuttugu manns. Þeim var komið til sinna heima.

Þetta er ekki í fyrsta sinn sem það gerist, en undir lok febrúar leysti lögreglan upp stórt samkvæmi á staðnum, þar sem allir gestir reyndust undir aldri.

Þá komu átta fíkniefnabrot upp á veitingastöðum í miðborginni, en að sögn lögreglu var um lítið magn efna að ræða hverju sinni.

Víðast hvar annars staðar var nóttin róleg hjá lögreglu. Á Akureyri var fjölmennt en skemmtanahald fór vel fram, og lögregla þurfti að hafa minniháttar afskipti af skemmtanaþyrstum í Reykjanesbæ.

Þá brann bíll á Selfossi, en ekki er talið að um íkveikju hafi verið að ræða.