Forritunarkeppnin hófst kl. 9 í morgun og stóð fram á kvöld. mbl.is/Ómar

Hópur nemenda úr Tækniskólanum sem kallar sig „We´re just here for the pizza“ bar sigur úr býtum í Forritunarkeppni framhaldsskólanna sem haldin var í Háskólanum í Reykjavík um helgina. Alls tóku 30 lið þátt í keppninni, samtals 82 keppendur og hafa þeir aldrei verið fleiri, en þetta var í 10. skiptið sem keppnin var haldin. Aðalskipuleggjendur keppninnar eru Háskólinn í Reykjavík og Nýherji.

Keppnin gengur út á að leysa margvíslegar þrautir og dæmi með því að hanna tölvuforri t og var keppt í þremur þyngdarflokkum. Liðið „We´re just here for the pizza" fór með sigur af hólmi í Alpha-deildinni, sem er erfiðasta deildin. Tækniskólanemendur áttu einnig liðin sem urðu í 2. og 3. sæti Alpha-deildar; „Code Ninja" og „3/0=42"

Í Beta-deild bar „Tölvuakademían" sigur úr býtum, en það lið var skipað nemendum úr Menntaskólanum í Reykjavík. MR-ingar áttu sömuleiðis liðið sem varð í 2. sæti; „Synergy" og í 3. sæti var „tEAM kONNI" úr Tækniskólanum.

Flest lið tóku þátt í Delta-deildinn, þar sem minnstrar forkunnáttu var krafist. Þar hreppti sameinað lið nemenda úr Menntaskólanum við Hamrahlíð og Fjölbrautaskóla Suðurlands sigurinn undir nafninu „/*Forritun*/". Í 2. sæti varð lið úr MH; „The # ones" og „Glas", lið Tækniskólanema, varð í 3. sæti.

Sigurvegarar Alpha-deildarinnar fengu að launum niðurfellingu skólagjalda fyrstu annar við tölvunarfræðideild HR og flakkara frá Nýherja. Aðrir verðlaunahafar keppninnar voru leystir út með glæsilegum verðlaunum frá Nýherja. Á meðal verðlauna má nefna myndavélar, flakkar, minnislykla og heyrnatól.

Eins og fyrr segir var í ár haldið upp á 10 ára afmæli Forritunarkeppninnar. Markmið hennar er að efla og örva forritunaráhuga íslenskra ungmenna og er keppnin alls ekki eingöngu ætluð þeim sem hafa mikla forritunarkunnáttu, heldur fyrir alla þá sem hafa áhuga á forritun.