„Ég bara skil ekki hvað er að verða af þessu litla landi okkar og fólkinu í landinu, svo ég segi alveg eins og er,“ segir Anna Jónsdóttir, verkefnisstjóri hjá Fjölskylduhjálp Íslands í Reykjanesbæ.

Líkt og greint var frá í Morgunblaðinu um helgina var úthlutun Fjölskylduhjálparinnar í Reykjanesbæ í síðustu viku sú stærsta hingað til, að jólaúthlutun undanskilinni. Alls fengu 242 fjölskyldur aðstoð, en hver fjölskylda samanstendur að meðaltali af þremur einstaklingum að sögn Önnu.

Atvinnuástand á Suðurnesjum hefur versnað mikið frá hruni og er atvinnuleysið þar nú það mesta á landinu. Samkvæmt tölum Vinnumálastofnunar voru tæplega fimmtán af hundraði atvinnulausir þar í febrúar.

Líkt og skjólstæðingar Fjölskylduhjálpar Íslands í Reykjavík eru þeir sem þiggja aðstoð í Reykjanesbæ á öllum aldri og aðstæður þeirra breytilegar. Anna segir sárast að sjá ungt fjölskyldufólk sem berst við að halda sér á floti, og eins eldra fólk, jafnvel yfir áttrætt, sem á ekki til hnífs og skeiðar.