Nesstofa var embættisbústaður landlæknis á 18. öld.

Lög um sameiningu embættis landlæknis og Lýðheilsustofnunar voru samþykkt á Alþingi í dag  með 29 samhljóða atkvæðum. Þingmenn Sjálfstæðisflokks sátu hjá við atkvæðagreiðsluna.

Jafnframt samþykkti meirihluti þingsins með 27 atkvæðum gegn 12  breytingartillögu frá Merði Árnasyni, þingmanni Samfylkingarinnar, um að nýja stofnunin heiti Embætti landlæknis en ekki Landlæknir - lýðheilsa eins og gert var ráð fyrir í frumvarpi um sameininguna.

Mörður sagði, að embætti landlæknis hefði verið til í fjórðung þúsaldar og vonandi sæju menn hina sögulegu hefð sem nauðsynlegt væri að hafa í heiðri og greiddu atkvæði samræmi við sinn þjóðernislega metnað og það sögulega samhengi sem skapaðist þegar Friðrik V skipaði Bjarna Pálsson  landfysikus hér uppi á Íslandi til að gæta að lýðheilsu Íslendinga.

Þórunn Sveinbjarnardóttir, flokkssystir Marðar, sagði að afstaða hennar til tillögu Marðar hefði ekkert með þjóðerniskennd að gera eða virðingu fyrir gamalli karllægri íslenskri sögu.

„Það er kannski kominn tími til að hugsa nýjar hugsanir, hugsa takt við tímann, finna sig í réttri öld; við erum í 21. öldinni og ég vona að stofnunin muni heita Landlæknir - lýðheilsa, " sagði Þórunn.

Jónína Rós Guðmundsdóttir, þingmaður Samfylkingarinnar, sagði að gamalt og gott og nýtt og ferskt næði ágætlega saman í nafninu Landlæknir-lýðheilsa og þetta hefði verið niðurstaða starfsfólks stofnananna tveggja. 

Árni Johnsen, þingmaður Sjálfstæðisflokksins, sagði að það væri mjög skemmtilegt að upplifa að vera sammála Merði Árnasyni. Og Birkir Jón Jónsson, þingmaður Framsóknarflokksins, lýsti yfir eindregnum stuðningi við tillögu Marðar „sem hefur svo oft reynt að koma hér upp sem boðberi sátta eins og við þekkjum."