Hugmyndir um launahækkanir sem Samtök atvinnulífsins lögðu fyrir viðsemjendur sína í gær, til að höggva á hnút sem myndast hafði í viðræðunum, er háð því að ríkisstjórnin fallist á lækkun atvinnutryggingagjalds og að kveða fastar að orði um auknar fjárfestingar til að koma hjólum atvinnulífsins betur af stað en gert er í yfirlýsingu ríkisstjórnarinnar frá því fyrir helgi.

Í umfjöllun um mál þetta í Morgunblaðinu í dag kemur fram, að viðræðurnar hafi hangið á bláþræði í gærmorgun vegna ágreinings um launaliðinn, einkum um sérstaka hækkun lægstu launa sem vinnuveitendur telja að gangi mjög nærri fyrirtækjum í ákveðnum atvinnugreinum. Þeir kynntu þó hugmyndir til lausnar sem ASÍ telur að komi verulega til móts við kröfur sínar. Þetta útspil er þó ekki endanlegt tilboð og er háð ýmsum skilyrðum sem einkum snúa að efnahagsumhverfinu og rekstrarskilyrðum fyrirtækjanna í landinu.

Því var ekki mikið bil á milli samninganefndanna þegar þær skildu í gærkvöldi. Svör ríkisstjórnarinnar virðast geta ráðið miklu um framvinduna næstu daga. „Ég tel að tekist hafi að ýta þessum málum verulega áfram en það er einnig ljóst að það þarf að fá niðurstöðu frá stjórnvöldum varðandi ákveðin atriði,“ segir Gylfi Arnbjörnsson, forseti Alþýðusambands Íslands.

Steingrímur J. Sigfússon fjármálaráðherra segir tillögur samningsaðila til skoðunar.