Ögmundur Jónasson Ernir Eyjólfsson

„Ég skil mætavel að Vestmannaeyingar vilji leita allra ráða til að halda uppi samgöngum milli Eyja og lands, við Þorlákshöfn og þá ekki síður Landeyjahöfn,“ segir Ögmundur Jónasson, innanríkisráðherra, um óskir þess efnis að öðrum skipum en Herjólfi verði heimilað að sigla milli lands og Eyja. Siglingastofnun segir, að með tilliti til öryggissjónarmiða, geti stofnunin ekki fallist á opna Landeyjahöfn fyrir farþegasiglingum annarra skipa en Herjólfs.

„Þetta hefur áður komið upp, að heimila skuli öðrum skipum en Herjólfi að stunda farþegaflutninga á milli Landeyjahafnar og Eyja,“ segir Ögmundur en segir að aðeins tvö skip, Herjólfur og Grímseyjarferjan, uppfylli þær kröfur um öryggi sem séu skilyrði þess að skip sigli með farþega milli lands og Eyja.

„Nú eru veður rysjótt og þá óttast margir að við værum að fara út á vafasamar brautir ef við opnuðum á siglingar með öðrum farkostum þannig að mér sýnist þetta ekki vera fær leið eins og sakir standa en að sjálfsögðu hljótum við að skoða allt með opnum huga en þó aldrei þannig að við teflum örygginu í tvísýnu,“ segir Ögmundur ennfremur.

Elliði Vignisson, bæjarstjóri Vestmannaeyja, sendi Ögmundi og Hermanni Guðjónssyni, siglingamálastjóra, nýverið bréf þar sem farið er fram á að sérleyfi Herjólfs til siglinga í Landeyjahöfn verði aflétt og að smærri skipum verði gefinn kostur á að sigla milli hafnarinnar og Vestmannaeyja með farþega. 

Herjólfur í Landeyjahöfn Rax / Ragnar Axelsson