Vilhjálmur Birgisson. SteinarH

Vilhjálmur Birgisson, formaður Verkalýðsfélags Akraness, skorar á félagsmenn sína að kynna sér allar hliðar á Icesave málinu til hlítar og taka afstöðu útfrá sinni eigin skoðun. 

Vilhjálmur hefur í fjölmiðlum í dag gagnrýnt forsvarsmenn Samtaka atvinnulífsins og Alþýðusambands Íslands harðlega fyrir yfirlýsingar í gær um að endurskoða verði forsendur kjarasamninga verði Icesave-lögin felld í þjóðaratkvæðagreiðslu á laugardag. Hann ítrekar þá gagnrýni á vef Verkalýðsfélags Akraness í dag og segir að það sé þyngra en tárum taki að verða vitni að þeim hótunum sem Samtök atvinnulífsins og einstaka forystumenn innan Alþýðusambands Íslands beiti þessa dagana vegna þjóðaratkvæðagreiðslunnar um Icesave.

„Eins og fram hefur komið í fréttum síðustu sólarhringa hafa þessir aðilar hótað íslenskum launþegum því að ef lögin um Icesave verði ekki staðfest í atkvæðagreiðslunni sem fer fram á laugardaginn þá verði ekki gengið frá kjarasamningum og þar af leiðandi muni kjarabætur til íslenskra launþega dragast enn frekar," segir Vilhjálmur m.a.