Starfsfólk ÍTR og skólastjórnendur fjölmenntu á fund með borgarfulltrúum meirihlutans í morgun. Mbl.is/Sigurgeir Sigurðsson

Oddný Sturludóttir, formaður menntaráðs segir að sér finnist það persónulega mjög heillandi hugmynd að skóli og frístundir flæði meira saman á vinnudegi barna í Reykjavík. Á hinn bóginn séu aðrir sem vilji skarpari skil þarna á milli. „Á þessu eru einfaldlega deildar meiningar og það er gott að ræða það," sagði Oddný, á fundi sem boðaður var með starfsfólki ÍTR og skólastjórnendum í dag.

Á fundinum var rædd „Tillaga 1" um sameiginlega yfirstjórn grunnskóla og frístundaheimila í Reykjavík. Lagt er til að stefnumótun skóla- og frístundaheimila verði sameiginleg í allri borginni frá og með hausti 2012 en jafnframt stefnt að því að haustið 2011 verði skóla- og frístundastarf samþætt í a.m.k. einu hverfi til að undirbúa breytinguna í borginni allri.

Oddný sagði að breytingarnar væru nú á þeim stað í ferlinu að umsagnir menntaráðs og ÍTR séu í vinnslu og umsagnir foreldra, skólaráða og fagaðila til skoðunar. Oddný sagði að allt starf með börnum ætti að vera í stöðugri þróun og því væri áhugavert að velta fyrir sér hvað skólastarfið og frístundastarfið eigi sameiginlegt og hvað ekki. „Viljum við horfa á hvað bindur það saman að gera sem mest úr sérstöðu hvers fyrir sig?" spurði Oddný.

Hún sagði að margir sæju tækifæri í því að skoða núverandi fyrirkomulag skóla- og frístundastarfs með hliðsjón af meiri samfellu í þjónustu, að það væri ein rödd sem talaði í staðinn fyrir tvær. „Ættum við ekki að skoða það alvarlega hvort við getum ekki þróað skóla- og frístundastarfið okkar áfram þannig að við komumst nær því að ná heildstæðum vinnudegi?" Oddný sagði jafnframt að Menntavísindasvið Háskóla Íslands hefði lýst miklum áhuga á því að vinna með menntaráði að mótun sameinaðrar starfsemi skóla og frístundaheimila. 

Fólkið á gólfinu enn í sömu störfum

Eva Einarsdóttir borgarfulltrúi Besta flokksins í menntaráði sagði eðlilegt að margar spurningar vöknuðu meðal starfsfólks um það sem snúi að almennum rekstri, umsýslu og skráningar barna sem dæmi. „Í sannleika sagt höfum við ekki nákvæmt svar enn á borði, það er verið að skoða þessi mál en við erum ekki alveg kominn á þann stað að vera búin að ákveða hvernig þetta eigi að vera. Fólk talar um að það sé of mikill hraði á hlutunum, ég get tekið undir það að sumt er að fara mjög hratt, en þess vegna viljum við sjá þetta sem þróunarverkefni eins konar og byrja í einu hverfi."

Hún lagði jafnframt áherslu á það að starfsfólki frístundaheimilanna yrði áfram boðið sömu störf. Markmiðið væri að breyta yfirstjórninni og stefnumótuninni þannig að hún yrði að einni einingu, en starf fólksins á gólfinu ætti lítið að  breytast.