Fiskibátar í Kambódíu. Reuters

Sex íslenskar stúlkur voru hætt komnar þegar bátur sem þær voru á hvolfdi við strönd Sihanoukville í Kambódíu í gær. Ein þeirra lokaðist inn á klósetti þegar bátnum hvolfdi, en náði að sparka upp hurðinni og synda undan bátnum.

Stúlkan segir í tölvupósti til mbl.is að um 90 manns hafi verið á bátnum sem var tveggja hæða. Hún segist hafa tekið eftir því strax í uppi ferðar að báturinn vaggaði mikið og ekki hafi þurft meira til en tvær manneskjur löbbuðu yfir á aðra hlið til að hann tæki að halla. Þær hafi reynt að láta þetta ekki trufla sig of mikið, heldur reynt að njóta ferðarinnar, hlustað á tónlist og sumar hafi hoppað út í sjóinn.

Eftir um tveggja tíma siglingu hafi báturinn hallast mjög mikið. „Á þessum tímapunkti sátu fimm okkar á eftir hæð bátsins, en ein okkar var niðri, læst inni á klósettinu. Einhvern vegin tókst henni að sparka upp hurðinni, en klósettið var þá að fyllast af vatni. Henni tókst að synda undan bátnum sem var þá kominn a hvolf. Fljótlega eftir að bátnum hvolfdi komu fiskibátar sem höfðu verið á veiðum í kring og björguðu öllum úr sjónum. Enginn slasaðist alvarlega sem betur fer. Við sluppum allar með skrámur og mar, en vorum vissulega í miklu sjokki þegar við loksins komum á þurrt land.“

Hún segir að það hafi verið mikið lán að þetta gerðist meðan enn var bjart úti. Öryggisbúnaður bátsins hafi verið bágborinn. Enginn sjúkrabíll eða björgunarsveit hafi tekið á móti hópnum þegar hann kom í land. Ekki hafi verið nákvæmlega skráð hverjir voru í bátnum þegar lagt var af stað og því hafi þeir sem stóðu að ferðinni átt í erfiðleikum með að staðfesta að allir hefðu bjargast.

Í frétt AP um atvikið segir að bátnum hafi hvolft vegna þess að drukkið fólk hafi verið að dansa um borð í bátnum. Stúlkan segist ekki hafa orðið var við drukkið fólk um borð þó vera kunni að einhver hafi verið með bjór. Að hennar mati hvolfdi bátnum vegna þess að hann var einfaldlega mjög óstöðugur og að mjög margir farþegar voru á efri hæð bátsins.

Hún segir ástæðu fyrir ferðamenn til að varast bátsferðir í þessum heimshluta. Það sé greinilega algengt að öryggismál í þessum bátum séu ekki í lagi.