Vigdís Hauksdóttir. mbl.is/Ómar

„Ég hef tekið ákvörðun um að gefa ekki formlega kost á mér," segir Vigdís Hauksdóttir þingmaður Framsóknarflokksins. Vigdís tilkynnti þetta á flokksþingi Framsóknarflokksins sem nú fer fram á Hótel Sögu. Enginn hefur enn lýst yfir mótframboði gegn sitjandi formanni og varaformanni Framsóknarflokksins, þeim Sigmundi Davíð Gunnlaugssyni og Birki Jóni Jónssyni, en kosið verður á morgun.

Aðspurð hvað hafi ráðið þessari ákvörðun segist Vigdís hafa þurft að vega og meta kostina. „Við erum með tiltölulega nýkjörna forystu, því það var endurnýjað alveg á síðasta flokksþingi. Þau hafa setið í tvö ár þannig að þetta er nú fyrst og fremst kannski að ég vilji gefa þessari forystu tækifæri til að vinna sig upp í fylgi og sanna sig betur."

Þingflokkurinn hafi verið í miklum ólgusjó eins og aðrir stjórnmálaflokkar síðustu ár og því hafi ekki gefist nægilegur tími til að byggja upp flokksstarfið.  „Ég geri þetta á þeim sanngirnissjónarmiðum að gefa þeim tækifæri þó að það hafi verið fjölmörg rök fyrir því að ég gæfi kost á mér eins og kynjasjónarmið og að klára endurnýjunina, og að margir telja að flokkurinn færi upp í þingi ef ég verði varaformaður," segir Vigdís.  „Það eru líka mörg þung mál fyrir þinginu, sjávarútvegsmálin og evrópumálin og ég tel farsælla að landa þeim heldur en kannski að fólk þurfi líka að huga að harðri kosningabaráttu."

Vigdís telur ólíklegt að ný framboð til formanns- og varaformannsembættana komi úr þessu. „En ég minni jafnframt á það að allir Framsóknarmenn eru í kjöri í hvaða embætti sem kosið er um á flokksþingi," segir Vigdís.