Atvikið varð við suðurenda Borgarfjarðarbrúar.

„Það kom hrikaleg hviða með grjóti og öllu,“ sagði Pétur Davíðsson, frá Grund í Skorradal. Hann var á heim leið með fjölskyldu sína, konu og þrjú börn, nú síðdegis þegar þau lentu í sannkallaðri grjóthríð við enda Borgarfjarðarbrúarinnar. Rúður brotnuði í a.m.k. fjórum bílum.

Brúnni var lokað vegna óveðursins.

„Maður sá varla í næstu stiku og er stutt á milli þeirra á brúnni. Við vorum komin þar sem litla höfnin er og sáum ekki neitt. Ég ákvað að fara út í kant og stoppa. Ég fann alveg grjóthríðina berja á bílnum,“ sagði Pétur. Hann sagði að bílarnir fyrir aftan hann hafi einnig stoppað og sumir verið næstum þversum á veginum.

„Við ákváðum að snúa við og þá sáum við að hliðarrúðurnar höfðu farið úr þremur bílum og úr þeim fjórða fóru bæði hliðarrúðurnar og afturrúðan út,“ sagði Pétur. Grjótið dreif yfir grjótvarnargarðinn og lenti á bílunum.

Engar rúður brotnuðu hjá Pétri og þakkar hann því að þau eru á jeppa. Grjótið buldi á hlið jeppans en náði ekki upp í rúðurnar. Grjótregnið var hins vegar í rúðuhæð fólksbíla.

Pétur sagðist aldrei fyrr hafa lent í svona grjóthríð. Hann er þó ýmsu vanur og hefur verið skólabílstjóri í Borgarfirði í 11 ár. Þau sluppu án meiðsla en dóttur þeirra, sem er 11 ára, stóð ekki á sama í hamaganginum.