Skálinn er gerónýtur. mbl.is/Ómar Óskarsson

Garðskáli við Norræna húsið í Vatnsmýrinni brotnaði í óveðrinu sem gekk yfir landið í gær. Skálinn féll til grunna og er gerónýtur. Skálinn var í eigu Norræna hússins.

Mikið óveður gekk yfir Suðvestur- og Vesturland í gær. Um 300-400 tilkynningar bárust til lögreglu. Um áttaleytið í gærkvöldi voru björgunarsveitir Slysavarnafélagsins Landsbjargar búnar að sinna 210 aðstoðarbeiðnum á höfuðborgarsvæðinu og um 140 á Suðurnesjum og nokkrum tugum á öðrum stöðum á landinu. Alls tóku rúmlega 200 björgunarsveitarmenn þátt í aðgerðunum. 

Þrátt fyrir að veðrið hafi verið einna verst á Suðurnesjum bárust einnig beiðnir um aðstoð frá höfuðborgarsvæðinu, Akranesi, Borgarnesi og víðar. Víða fuku þakplötur.  Einn maður meiddist lítillega þegar grindverk fauk á hann á Skólavörðuholtinu í Reykjavík.

Með vaxandi trjágróðri kemur aukið skjól en trén gefa sig líka stundum. Slökkvilið höfuðborgarsvæðisins þurfti m.a. að aðstoða húseiganda við Túngötu þar sem tré brotnuðu. Björgunarsveitin Ársæll þurfti að saga og fjarlægja fallið tré á Vitastíg, til að opna götuna aftur fyrir umferð.