Margir fara til Spánar yfir veturinn til að iðka þar íþróttir og útivist og lengja þannig sumarið. Myndin er frá Benidorm. Brynjar Gauti

Farangur fólks sem fór með Iceland Express til Alicante á Spáni á laugardaginn og var skilinn eftir á Íslandi barst í gærkvöldi og í nótt. Farþegi sem rætt var við í gær vegna farangursleysis sagði að allt hafi verið komið þegar þau komu í morgunmat í morgun.

Í gær sagði mbl.is frétt af hópi golfleikara sem fóru héðan á laugardag til Spánar. Á áfangastað kom í ljós að marga vantaði sumt eða allt af farangrinum. Þeir sem fengu ekki golfsettin sín voru ekki mjög glaðir yfir því.

Auk golfspilaranna fór einnig 26 manna hópur knattspyrnumanna úr HK í æfingaferð til Spánar í ferðinni á laugardaginn var. Þegar út var komið vantaði farangur fjögurra knattspyrnumanna. Tveir fengu töskurnar sínar á sunnudag en tveir ekki fyrr en nú síðdegis á þriðjudegi.

Mbl.is ræddi við einn knattspyrnumannanna sem vantaði allan farangurinn sinn við komuna út. Hann fékk farangurinn í dag, klukkan 16.00 að spænskum tíma. „Þessi ferð hefur verið hrikaleg fyrir mig,“ sagði knattspyrnumaðurinn. „Þessir þrír dagar hafa eiginlega verið ónýtir.“

Knattspyrnumaðurinn kvaðst hafa fengið lánaða fótboltaskó til að geta æft á sunnudag, því hann vantaði skóna sína. Hann var óvanur lánsskónum og uppskar blöðrur á fæturna og fékk mjög slæmt hælsæri. „Ég hef ekkert getað æft í gær og í dag,“ sagði ungi maðurinn og var að vonum ekki ánægður með það.