Aðalfundur Félags íslenskra rafvirkja, sem haldinn var í gær, krafðist þess að þegar í stað yrði gerður skammtímasamningur, þannig að launamenn fái strax einhverjar launahækkanir. Forsendur fyrir 3 ára samningi væru ekki lengur fyrir hendi.

Félag íslenskra rafvirkja er stærsta félagið innan Rafiðnaðarsambands Íslands. „Við undirbúning kjarasamninga fyrr í vetur kom fram í samþykktum rafiðnaðarmanna, að ef gera ætti langtímasamning þyrfti að liggja fyrir skýr stefna um uppbyggingu í atvinnulífinu, ásamt því hvernig tekið yrði á efnahagsmálum og kaupmáttur tryggður.

Yfirlýsingar stjórnvalda um endurreisn atvinnulífsins í Stöðugleikasáttmála stóðust ekki og afleiðingar þess blasa nú við, aldrei hefur fjárfesting verið minni í atvinnulífi og enn eru um 15 þús. launamenn atvinnulausir, þrátt fyrir að margir hafi horfið til náms eða flutt erlendis. Tæknifyrirtæki eru að flytja erlendis vegna gjaldeyrishafta og vaxandi einangrunar íslensks efnahagslífs.

Á næstu tveim árum þarf að skapa um 20 þús. störf eigi að taka á móti fjölgun á vinnumarkaði og ná atvinnuleysi niður. Kröfur um að ná kaupmætti tilbaka eru háværar auk þess að hækka sérstaklega lægstu laun og taka til í bótakerfinu. Launamenn sýndu í vetur mikla ábyrgð þegar þeir samþykktu að kanna til hlítar ásamt SA og ríkisstjórn hvort tryggja mætti stöðugleika og vaxandi kaupmátt með 3ja ára kjarasamningum.

Nú er komið fram í miðjan apríl og páskar framundan og ekki hefur náðst niðurstaða. Eftir kosningar um Icesave hefur óvissan aldrei verið meiri. Þær launahækkanir ásamt því sem ríkisstjórnin hefur lagt til, er enn töluvert fjarri að duga til þess að byggja megi á því þriggja ára kjarasamninga. Samfara því hafa atvinnurekendur verið með veigamikla fyrirvara um sína aðkomu.

Aðalfundur Félags íslenskra rafvirkja haldinn 11. apríl telur að óbreyttu verði ekki gengið lengra á þessari braut. Fundurinn krefst þess að þegar í stað verði gengið til gerðar skammtímasamnings á meðan þetta óvissuástand ríkir, þannig að launamenn fái strax einhverjar launahækkanir. Verði það ekki gert eru umtalsverðar líkur á vaxandi ófriði á vinnumarkaði, sem muni leiða til enn frekari óvissu og meiri ófara í íslensku efnahagslífi,“ segir í ályktun fundarins.