Aðilar vonast til að ná samningum á föstudag. Árni Sæberg

Samningaviðræður ASÍ og SA héngu á bláþræði en viðbrögð ríkisstjórnarinnar í morgun dugðu til þess að látið væri á það reyna að ná saman. Setja á kraft í viðræðurnar á morgun og helst ljúka þeim á föstudag. Þetta segir Gylfi Arnbjörnsson, forseti ASÍ, um þróun kjaraviðræðnanna í dag.

„Það var komið þannig til móts við okkur í samskiptum við stjórnvöld og líka við atvinnurekendur, bæði tengt þessu verkefni að gera þriggja ára samning, en líka það að þessu myndi þá örugglega, ef þetta tækist ekki á endanum, ljúka með gerð skammtímasamnings,“ segir Gylfi um ástæður þess að viðræður eru nú komnar á gott skrið á ný.

Hann segir ljóst að sjávarútvegsmálin hafi þvælst mikið fyrir en ríkisstjórnin og samninganefnd SA munu hittast í fyrramálið til að fara yfir þau mál. „Þetta mál hefur alltaf staðið á milli atvinnurekenda og stjórnvalda,“ segir Gylfi. 

„Við höfum gagnrýnt bæði stjórnvöld og atvinnurekendur fyrir stöðu mála. Við teljum eðlilegt að stjórnvöld eigi samráð við hagsmunaaðila í greininni um sína lífsafkomu, hvort sem um er að ræða útgerðarmenn, fiskverkendur, sjómenn eða landverkafólk. Og teljum þess vegna að það ætti að vera meira samráð og samstaða um framtíðarfyrirkomulag í sjávarútvegsmálum. En við höfum líka gagnrýnt atvinnurekendur fyrir að stilla þessu svona upp í kjarasamningum og það er alveg ljóst að þau atriði sem þeir hafa verið að nefna til skjalanna eru atriðið sem við erum ekki sátt við.“