mbl.is

Icelandair segir, að reikna megi með að um 75-100 þúsund fleiri ferðamenn sæki Ísland heim í ár en á síðasta ári og þeir verði í heild allt að 600 þúsund. Gjaldeyristekjur af aukningunni einni verði þannig um 30 milljarðar króna.

Icelandair segir, að áætlað sé að 50% fleiri ferðamenn komi til landsins með Icelandair í apríl en í sama mánuði í fyrra og 15% fleiri en 2009. Jafnframt sé áætlað að fjölgunin verði 15-20% yfir vor- og sumarmánuðina framundan samkvæmt bókunum félagsins. Þetta sé einhver mesti vöxtur ferðaþjónustunnar á Íslandi á einu ári frá upphafi mælinga.

Birkir Hólm Guðnason,  framkvæmdastjóri Icelandair, segir í tilkynningu, að  þessi árangur sé afrakstur af auknu flugframboði og öflugu heils árs markaðsstarfi Icelandair í vetur, og jákvæðra áhrifa af Inspired by Iceland átakinu gæti enn. Þetta sé í samræmi við þær áætlanir sem við höfum áður kynnt og háð því að ófyrirséðir atburðir setji ekki strik í reikninginn.

Mikla fjölgun ferðamanna milli ára í apríl má einnig rekja til áhrifa eldgossins á síðasta ári, en síðari hluta aprílmánaðar afbókuðu margir ferðir sínar. Þessara áhrifa gætti einnig í maí.

Svipaður fjöldi ferðamanna, eða um 500 þúsund, kom til Íslands árin 2009 og 2010. Beinar gjaldeyristekjur af komu erlendra ferðamanna á árinu 2009 og 2010 voru um 155 milljarðar króna.