Innlent | mbl | 14.4.2011 | 19:09

Ásmundur Einar segi af sér

Ásmundur Einar Daðason, alþingismaður.

Svæðisfélag Vinstri grænna á Vestfjörðum skorar á Ásmund Einar Daðason, þingmann kjördæmisins, að segja af sér þingmennsku. Honum sé ekki stætt á að sitja áfram eftir að hann samþykkti vantrauststillögu á ríkisstjórnina. Ályktun þessa efnis var samþykkt á félagsfundi nú fyrir stundu.

Í ályktuninni segir að hann hafi verið kosinn í nafni flokksins og hafi setið þar í umboði kjósenda sinna. Ásmundur Einar hafi samþykkt vantraust á ríkisstjórn sem VG á aðild að og sagt sig úr þingflokknum án samráðs við félögin sem að framboði hans stóðu og því sé ekki hægt að sjá að hann geti setið áfram í umboði kjósenda VG.

Jafnframt óskar félagið eftir því að Ásmundur Einar boði til fundar með flokksmönnum hið allra fyrsta þar sem hægt verður að fara yfir þetta mál.