Sundlaugar borgarinnar lagaðar

Borgarráð samþykkti í dag framkvæmdaáætlun um endurbætur á sundlaugunum að upphæð 275 milljónir, en alls er gert ráð fyrir 500 milljónum króna í fjárhagsáætlun 2011.

Framkvæmda- og eignasviði er því heimilt að hefjast handa við hönnun og framkvæmdir. Endurbæturnar sem snúast ýmist um viðhald eða nýframkvæmdir ná til allra almenningslauga borgarinnar, sem og Ylstrandarinnar í Nauthólsvík.

Samkvæmt upplýsingum frá Reykjavíkurborg fer rúmlega helmingur framkvæmdafjár núna til verkefna við Laugardalslaug.  Gönguleiðir á laugarsvæðinu verða endurgerðar og upphitaðar. Þá verður komið fyrir nýjum sjópotti og farið í fyrsta áfanga á endurgerð búningsherbergja. Fleiri leiktækjum verður komið fyrir í barnalaug.

Í Grafarvogslaug verður eimbaðið endurgert, í Árbæjarlaug verður unnið við nuddpott og í tengslum við Breiðholtslaug er til skoðunar að koma fyrir líkamsræktaraðstöðu.

Gufubað á Ylströndinni er á teikniborðinu og einnig er fyrirhugað að fjölga þar leiktækjum. Hvort tveggja tengist þeirri hugmynd að halda ströndinni opinni allt árið en vinsældir hennar til sjóbaða aukast stöðugt.

• Blogga um frétt