mbl.is/RAX

Björn Zoëga, forstjóri Landspítalans, segir hækkun Orkuveitunnar á heitu vatni um 8% og fráveitugjaldi um 45% þann 1. maí nk. muni leiða til 23 milljóna króna kostnaðarauka fyrir Landspítala.

Í föstudagspistli sínum á vef LSH segir Björn ljóst að reyna þurfi að finna leiðir til hagræðingar á móti þessu. Það sé hins vegar stöðugt erfiðara að koma í veg fyrir að kostnaðarhækkanir af þessu tagi komi niður á þjónustu við sjúklinga.

Björn bendir á að hann hafi áður nefnt þann kostnaðarauka sem hljótist af því að Strætó hafi minnkað þjónustu sína á kvöldin og um helgar. Auk þess hafi hann nefnt að síðastliðið haust hafi Orkuveitan ákveðið að hækka sína gjaldskrá og sú hækkun hafi komið til framkvæmdar 1. febrúar sl. Það hafi aukakostnað í för með sér fyrir spítalann upp á 50 milljónir.

„Við fengum síðan aðra tilkynningu í þessari viku um enn eina hækkunina hjá Orkuveitunni þar sem um er að ræða 8% hækkun á heitu vatni og 45% hækkun á fráveitugjaldi. Þessar nýjustu hækkanir, sem gilda frá 1. maí, munu leiða til 23 milljóna króna kostnaðarauka fyrir spítalann. Það er ljóst að við þurfum að reyna að finna leiðir til hagræðingar á móti þessu. Finnst mörgum sárt ef svona verðhækkanir og breytingar á þjónustu koma niður á þjónustu við sjúklinga en okkar markmið verður að reyna með öllum ráðum að koma í veg fyrir slíkt. Slík varnarbarátta verður þó stöðugt erfiðari,“ skrifar Björn.