Hús Orkuveitu Reykjavíkur. Ómar Óskarsson

Meirihluti stjórnar Orkuveitu Reykjavíkur samþykkti á fundi sínum í dag að ganga til könnunarviðræðna við Landsamband lífeyrissjóða um fjármögnun og/eða eignarhald á Hverahlíðarvirkjun.

Sóley Tómasdóttir, borgarfulltrúi, segir að tillaga fulltrúa Vinstri grænna í stjórninni um að málinu yrði frestað og það tekið til umfjöllunar af hálfu eigenda var felld og málið samþykkt með mótatkvæði hans.

Sóley gagnrýnir þessa ákvörðun harðlega í pistli  á heimasíðu sinni, og segir að þótt þegar hafi verið lagðir u.þ.b. 4 milljarðar króna í undirbúning Hverahlíðarvirkjunar sé ljóst að hátt á þriðja tug milljarða þurfi til að hún verði að veruleika. Orkuveita Reykjavíkur hafi enga burði til að bæta slíkum upphæðum í lánasafn sitt og ekki verði séð að ríkir almannahagsmunir krefjist þess. Þvert á móti sé nauðsynlegt að fyrirtækið sýni aukna ábyrgð í meðferð fjármuna nú þegar borgarbúar hafi hlaupið undir bagga til að koma því aftur á réttan kjöl eftir gassagang og áhættusækni undanfarinna ára.

„Í stað þess að karpa um fortíðarþrá og verkefni í anda gamla Íslands ætti stjórnin ætti að taka mið af kröfu samfélagsins um opinbert eignarhald á virkjunum og auðlindum og sjálfbæra nýtingu þeirra. Gleymum ekki kröfunni sem reist var með mikilli þátttöku almennings í aðgerðum gegn einkavæðingu HS-orku og endurtökum ekki þau mistök sem þá voru gerð. Því er nauðsynlegt er að eigendur Orkuveitu Reykjavíkur standi með almenningi og sameinist um það stóra og mikilvæga verkefni að tryggja grunnþjónustu fyrirtækisins gagnvart almenningi til allrar framtíðar," segir Sóley m.a. 

Vefur Sóleyjar Tómasdóttur