ASÍ hvarf af vettvangi
Setja bókamerki
Samtök atvinnulífsins, SA, segjast í yfirlýsingu hafa lagt fram tillögu til umræðu um sameiginlegan rökstuðning fyrir skammtímasamningi og jafnframt boðið að ASÍ legði fram eigin tillögu ef ekki væri falllist á tillögu SA. Því hafi verið hafnað og fulltrúar ASÍ horfið af vettvangi í Karphúsinu rétt fyrir miðnætti.
Segjast SA hafa boðið ASÍ að gera kjarasamning til skemmri tíma sem fylgdi 50 þúsund króna eingreiðsla til launþega í byrjun maí með möguleika á þremur 16.700 króna greiðslum til viðbótar í lok júní, júlí og ágúst, samtals kr. 50 þúsund.
„Samningsaðilar hafa undanfarna mánuði stefnt að gerð þriggja ára samnings sem byggði tilteknum efnahagslegum markmiðum um aukinn hagvöxt, fjölgun starfa, minna atvinnuleysi, verulega auknar fjárfestingar í atvinnulífinu, m.a. í orku- og iðnaðarverkefnum og innviðum samfélagsins.
Samtök atvinnulífsins hafa lagt á það áherslu að atvinnuleiðin verði farin út úr kreppunni og starfsumhverfi fyrirtækja verði bætt verulega svo fyrirtæki stór og smá í öllum greinum geti farið að ráða fólk á ný og auka umsvif sín.
Samtök atvinnulífsins eru tilbúin til að leggja mikið af mörkum til að gera kjarasamninga til lengri tíma. Að mati aðila vinnumarkaðarins er aðkoma ríkisstjórnarinnar að samningunum nauðsynleg en því miður hafa ekki enn reynst forsendur fyrir langtímasamningi þar sem ríkisstjórnin hefur ekki lagt fram trúverðugar áætlanir um að auka hagvöxt á næstu árum,“ segir í yfirlýsingu frá Samtökum atvinnulífsins, en á vef samtakanna hafa m.a. verið birt drög að samkomulagi við ASÍ.
Nýjar viðræður hafa ekki verið boðaðar í Karphúsinu og því algjör óvissa uppi um endurnýjun kjarasamninga á vinnumarkaði.
Spursmál: Fyrsta stóra viðtal Katrínar
Mikilvægt að vera á tánum
„Búið að vera í dreifingu í einhvern tíma“
Sárt að horfa upp á illa meðferð fjármuna
Hafa „ágætis tíma“ til úrbóta
Gerir ráð fyrir 150 samningum í næstu viku
Ný staða uppi og óvissan meiri