Flugvél frá flugfélaginu Delta á Keflavíkurflugvelli. mbl.is/hag

Áætlunarflug bandaríska flugfélagsins Delta Air Lines milli New York og Keflavíkur hefst í byrjun júní. Flugstjóri í fyrsta fluginu verður John S. Magnusson, sem er fæddur á Íslandi og hefur verið flugmaður hjá Delta í 34 ár.

Fyrsta flugvélin lendir í Keflavík að morgni 2. júní, en flogið verður fimm daga vikunnar milli áfangastaðanna fram á haust. 

Mun farþegaþota Delta, flug 51, fara frá Keflavíkurflugvelli til Kennedyflugvallar kl 10:50 að morgni og lenda í New York kl. 13:05 að staðartíma, samkvæmt áætlun.

Flug 52, til Íslands fer síðan frá Kennedyvelli kl. 23:35 að kvöldi og lendir á Keflavíkurflugvelli kl. 9:10 að morgni næsta dags. Tímasetningar flugs Delta miðast við staðartíma í Keflavík og New York. Ekki er flogið á þriðjudögum og miðvikudögum.

Í tilkynningu frá Delta segir, að flugfargjöld félagsins séu á mjög samkeppnishæfu verði hvort sem fólk ferðast á viðskiptafarrými eða almennu farrými.

Flugstjóri í fyrsta flugi Delta til Íslands verður John S. Magnusson, sem er fæddur á Íslandi og lærði flug á Reykjavíkurflugvelli. Hann stundaði flugnám hjá flugskólanum Flugtaki og fékk einkaflugmannsskírteini árið 1976. Hann hefur verið flugmaður hjá Delta í 34 ár, þar af flugstjóri í 13 ár. John er með íslenskan ríkisborgararétt, en hann er jafnframt ræðismaður Íslands í Minnesota.