Stormurinn er að ganga nður. mbl.is/Árni Sæberg

Lægðaveðrið sem barið hefur á landinu undanfarinn sólarhring er nú óðum að ganga niður en áfram verður strekkingur vestanlands, að sögn Veðurstofu Íslands.

„Veðrið er að lækka hægt og bítandi og stormurinn sem slíkur að ganga niður," segir Elín Björk Jónasdóttir vakthafandi veðurfræðingur á spádeild Veðurstofunnar. Enn er þó fremur slæmt veður á norðvestanverðu landinu og mjög hvasst á Steingrímsfjarðarheiði, þar sem vindhraði nær 24 m/sek sem og í Arnkötludal.

Stormurinn gekk yfir í tveimur hvellum, í gærkvöldi og í dag, og segir Elín að það skýrist af því að fyrst gengu fyrri skilin frá lægðinni yfir en svo fengum við snúðinn frá lægðinni, hin svokölluðu afturbeygðu skil. Þetta er svipað og varð í lægðinni fyrir um tveimur vikum þegar blés allhressilega.

„Svo fer lægðin núna aðeins vestur af landinu og snýst þar í smástund og gengur svo yfir landið aftur á morgun og veldur því að það verður hvasst á suðurlandinu," segir Elín. Þá mun lægðin þó hafa grynnkað og verður því líklega ekki eins hvasst og í dag en hinsvegar má búast við leiðindafærð í uppsveitum á suðurlandi og jafnvel í Borgarfirði. „Það verður svo mikill éljagangur í nótt að það gæti hreinlega orðið hvít jörð í fyrramálið. Svo verður vestanstrekkingur í uppsveitum á suður- og vesturlandinu og svo kemur slydda ofan í þetta þannig að færð á vegum gæti orðið varasöm og sumarbústaðafólk sem er á ferðinni á morgun ætti að passa sig," segir Elín.