mbl.is/Árni Sæberg

Aukin lýsing yfir akbrautum á svokölluðu aðlögunarsvæði innan gangamunna í Hvalfjarðargöngum, fjölgun neyðarsíma og slökkvitækja, aukin neyðarlýsing og fleira er á framkvæmdaáætlun Spalar í Hvalfjarðargöngum í ár. Kostnaður  er áætlaður alls um 130 milljónir króna, auk virðisaukaskatts. Að þessu var unnið þær 11 nætur sem lokað var fyrir umferð undanfarnar þrjár vikur og gert er ráð fyrir að ljúka verkinu í haust.

Þetta kemur fram á vef Spalar sem á og rekur Hvalfjarðargöng. Endurbæturnar eru liður í að gera göngin að enn öruggara umferðarmannvirki sem standast mun kröfur reglugerðar nr. 992/2007 með síðari breytingum. Reglugerðin á sér rætur í ESB-tilskipun um öryggi í veggöngum frá 2004.

Spölur fékk verkfræðistofurnar Mannvit í Reykjavík og Raftákn á Akureyri til að hanna breytingar á öryggisbúnaði í göngunum til að uppfylla skilyrði reglugerðarinnar og undirbúa í framhaldinu útboð vegna kaupa á efni og búnaði annars vegar og vegna vinnu hins vegar.

Samið var við 9 fyrirtæki um kaup á efni og búnaði fyrir um 70 milljónir króna og við Rafmiðlun í Kópavogi um vinnuþáttinn fyrir um 42 milljónir króna. Þegar allt er talið með munu framkvæmdirnar í ár kosta um 130 milljónir króna + vsk.

Á heimasíðu Spalar er fjallað um helstu verkþætti en þeir eru:

1.  Aðlögunarsvæði vegna lýsingar í göngunum voru lengd á árinu 2010 með reglugerðarbreytingu úr 270 metrum í 430 metra beggja vegna. Þetta kallaði á fjölgun ljóskastara yfir akbrautum til að auka þar birtu á þessum svæðum.
2.  Neyðarsímum fjölgar þannig að á milli þeirra verði 125 metrar í stað 500 metra nú. 
3. Slökkvitækjum fjölgar þannig að á milli þeirra verði 125 metrar í stað 250 metra nú. Hér er Spölur reyndar að gera mun betur en reglugerðin kveður á um því samkvæmt henni er fullnægjandi bil milli slökkvitækja í göngum í notkun 250 metrar.
4. Ljósaskilti verða sett upp til að vísa á neyðarstöðvar og útskot. 
5. Neyðarljósum fjölgar, þ.e. ljósum yfir akbrautum sem kvikna sjálfkrafa ef rafmagn fer af göngunum.
6. Flóttaljós verða sett upp með rúmlega 60 metra millibili. Þau vísa á hvorn munna og lýsa þrátt fyrir að rafmagn fari af göngunum. 
7. Lagðir verða ljósleiðarar og brunaþolnir strengir vegna stjórnstöðva lýsingar og vegna annars búnaðar í göngunum.