Össur Skarphéðinsson leggur blómsveig á minnismerki um Mahatma Gandí í dag,. Guðmundur Eiríksson sendiherra Íslands í Nýju-Delí fylgist með.

Össur Skarphéðinsson, utanríkisráðherra, óskaði formlega eftir því á fundi með  S. M. Krishna, utanríkisráðherra Indlands, í Nýju-Delhi, að Indverjar styddu áfram framgang efnahagsáætlunar Íslands í stjórn Alþjóðagjaldeyrissjóðsins.

Össur, sem er í opinberri heimsókn á Indlandi, þakkaði jafnframt fyrir það hversu vel Indverjar hefðu brugðist við óskum íslensku ríkisstjórnarinnar um liðsinni þegar langar tafir urðu á afgreiðslu áætlunarinnar á fyrri stigum Icesave-málsins.

Samkvæmt tilkynningu frá utanríkisráðuneytinu óskaði utanríkisráðherra Indlands eftir frekara samstarfi við Íslendinga á sviði sjávarútvegs og nefndi sérstaklega uppbyggingu fiskimjölsverksmiðja á sjávarútvegssvæðum Indlands og tækni varðandi pökkun og merkingu fiskafurða. Ráðherrarnir bundust fastmælum um að næsta skrefið í frekari samvinnu á sviði sjávarútvegs yrði að indversk stjórnvöld myndu senda indverska sérfræðinga til náms við sjávarútvegsháskóla Sameinuðu þjóðanna á Íslandi.

Samningar um fyrsta samstarfsverkefni íslenskra og indverskra fyrirtækja á sviði jarðhita, sem varðar gerð lítillar jarðvarmavirkjunar, eru á lokastigi. Óskaði Össur eftir samstarfi við indversk stjórnvöld um að byggja fleiri slíkar virkjanir, og bauð fram aðstoð Íslendinga við að þróa orkustefnu um jarðvarma á Indlandi. Talið er að nýtanlegur jarðhiti finnist á um 340 stöðum á Indlandi og mögulegt sé að virkja frá 1000 MW upp í allt að 10 þúsund MW.

Þá greindi utanríkisráðherra frá samstarfsverkefnum Indlands og Íslands um hönnun og gerð lítilla vatnsaflsvirkjana ofar snjólínu í fjallahéruðum norður-Indlands, og voru ráðherrarnir sammála um mikilvægi þess að nýta íslenska þekkingu á því sviði til að bæta lífskjör íbúa. Ráðherrarnir ræddu jafnframt stórhuga fyrirætlanir Indverja um virkjun sólarorku, og greindi utanríkisráðherra frá áhuga indverskra fjárfesta á að framleiða kísilflögur og búnað í sólarvirkjanir með endurnýjanlegri orku á Íslandi.

Í framhaldi af því ræddu ráðherrarnarnir samstarf Íslands og Indlands í alþjóðamálum og skiptust á skoðunum um stöðu mála í Norður-Afríku, Afganistan og Palestínu, og ræddu samskipti Indlands við grannríki sín, sem og stöðu Íslands og horfur á norðurslóðum.

Fyrr í dag lagði Össur blómsveig að minnismerki um Mahatma Gandhi, sjálfstæðishetju Indverja, og heimsótti síðan heimili Gandhis þar sem hann var ráðinn af dögum, en það er nú safn í minningu Gandhis.