Ákveðið að hætta við að álykta
Árni Þór Sigurðsson, þingmaður Vinstrihreyfingarinnar - græns framboðs. Ómar Óskarsson
Til stóð að annar fundur sameiginlegrar þingmannanefndar Íslands og Evrópusambandsins, sem fram fór í dag, myndi senda frá sér ályktun um stöðu umsóknarinnar um aðild að sambandinu líkt og fyrsti fundur nefndarinnar gerði í október síðastliðinn. Hins vegar var hætt við það á síðustu stundu þar sem ekki var einhugur um efni fyrirhugaðrar ályktunar.
„Það var bara niðurstaðan á fundinum að vera ekki að álykta neitt sérstaklega. Málið kom ekki einu sinni til umræðu. Það var búið að vinna ákveðin drög að ályktun sem bæði þingmenn okkar og þingmenn á Evrópuþinginu voru búnir að hafa til skoðunar. En við fórum aldrei svo langt á fundinum, við vorum með fullt af öðrum málum sem við vorum að ræða um og niðurstaðan varð sem sagt sú að vera ekki að álykta neitt á þessum fundi,“ segir Árni Þór Sigurðsson, þingmaður Vinstrihreyfingarinnar - græns framboðs og annar formanna sameiginlegu þingmannanefndarinnar.
Árni segir að fulltrúar Íslands hafi fengið drög að ályktuninni í hendur frá Evrópuþinginu um miðjan apríl og engar athugasemdir hafi borist við drögunum frá þeim „í sjálfu sér“. Hins vegar hafi komið breytingartillögur frá fulltrúum Evrópuþingsins í þingmannanefndinni sem hafi þó ekki verið alfarið í samræmi innbyrðis. Þá hafi verið uppi þau sjónarmið innan nefndarinnar að ekki yrði sátt um ákveðin atriði í drögunum innan hennar.
„Það var ekki alveg einhugur í hópi Evrópuþingmannanna um þær. Síðan var það þannig hjá okkur að það voru mismunandi skoðanir á því hvort menn ættu að vera að álykta og hversu mikið þannig að það varð niðurstaða okkar formannanna, mín og Gallagher, að leggja það ekki til,“ segir Árni Þór.
