Albert Kemp

Færeyska landsstjórnin sendi frá sér tilkynningu í dag þar sem ítrekuð er fyrri afstaða hennar í makríl-deilunni við Evrópusambandið og Norðmenn en Færeyingar hafa eins og Íslendingar farið fram á verulega aukna hlutdeild í makrílstofninum í Norður-Atlantshafi. Þá eru einnig ítrekuð þau rök sem Færeyingar hafa fært fyrir þeirri ákvörðun sinni að gefa einhliða út stóraukinn makrílkvóta í færeyskri lögsögu. Frá þessu er greint á vefnum Fishupdate.com í dag.

Færeysk stjórnvöld leggja þó sem fyrr áherslu á mikilvægi þess að ná samningum um skiptingu makrílstofnsins. Færeyingar hafi lagt sitt að mörkum til þess að tryggja sjálfbærar og ábyrgar veiðar á Norður-Atlandshafi í gegnum alþjóðlegt samstarf og muni gera það áfram. Taka yrði tillit til þess í samningum að makríll hefði aukist verulega í færeyskri lögsögu á undanförnum árum og að Færeyingar ættu þar með tilkall til aukinnar hlutdeildar í stofninum.

Fram kemur í tilkynningunni að Evrópusambandið og Norðmenn hefðu brugðist við kröfum Íslendinga og Færeyinga með löndunarbönnum og öðrum þvingunaraðgerðum. Þá hefðu norsk stjórnvöld neitað að endurnýja gamalgróna tvíhliða fiskveiðisamninga við Færeyinga fyrir árið 2011. Viðbrögðin hafi valdið miklum vonbrigðum.

„Allir hlutaðeigandi bera ábyrgð á núverandi stöðu mála og ættu að leitast við að vinna saman að því að finna sanngjarna lausn á stjórn makrílveiðanna. Framganga Evrópusambandsins og Norðmanna er aðeins til þess fallin að vinna gegn því sameiginlega markmiði,“ segir í tilkynningunni.