Lóð sem þessi munu heyra sögunni til. mbl.is/Heiddi

Fangelsismálayfirvöld hafa ákveðið að fjarlægja öll laus lóð úr fangelsum landsins í öryggisskyni. Þetta staðfestir Páll Winkel fangelsismálastjóri í samtali við mbl.is. Hann segir að þetta verði gert á næstu dögum.

Páll segir að aðgengi að öðrum líkamsræktartækjum verði tryggð, s.s. að hlaupabrettum og æfingastöðvum.

Páll segir að þetta sé gert vegna þess að hluti fanga lyfti mikið og sumir hverjir hafi bætt á sig miklum vöðvamassa á meðan afplánun stendur. Sumir séu jafnvel að taka um 200 kíló bekkpressu og 300 kíló í hnébeygju.

Dæmi séu um að fangar hafi nýtt sér styrk sinn til handrukkana að lokinni afplánun, en Páll bendir á að í ákveðnum tilvikum sé um að ræða einstaklinga sem hafi ítrekað hlotið dóma fyrir ofbeldisverk. Þetta sé því vandamál sem fangelsismálayfirvöld hafi orðið að bregðast við.

Þá segir Páll að aðgengi að þungum lóðum hafi ýtt undir notkun stera. „Við höfum að undanförnu tekið talsvert magn af sterum og hjá nokkrum föngum hefur mælst steranotkun. Það er auðvitað eitthvað sem við erum ekki sátt við.“

Tilkynnt var um þetta í dag og hvetur Páll fanga til þess að nýta sér önnur líkamsræktartæki og aðra líkamsrækt.

„Þetta er alveg í takt við það sem fangelsismálayfirvöld á Norðurlöndum hafa gert. Þau hafa dregið verulega úr lóðum og lagt áherslu á annars konar þrek,“ segir Páll í samtali við mbl.is.

mbl.is/Júlíus