Lögreglan hefur nokkrum sinnum gert upptækt verulegt magn af amfetamíni sem smyglað hefur verið til landsins. mbl.is/Júlíus

Lögreglan á höfuðborgarsvæðinu handtók í gær nokkra í tengslum við rannsókn á andláti ungrar konu í Árbænum um hádegisbilið á laugardag. Talið er að hún hafi neytt svonefndra PMA- eða PMMA-efna en það eru skynbreytandi amfetamínsafleiður sem valdið hafa fjölda dauðsfalla í mörgum löndum síðustu árin.

Tvær konur voru látnar lausar í gær eftir að hafa verið yfirheyrðar vegna málsins í Árbæ og tveir karlmenn síðar.

Fjórmenningarnir voru í blokkaríbúðinni þegar konan lést en eru ekki grunaðir um að hafa valdið dauðsfallinu, að sögn heimildarmanna mbl.is. Merki um fíkniefnaneyslu fundust í íbúðinni.

Krufning hefur ekki enn farið fram en lögreglan telur hugsanlegt að konan hafi látist vegna neyslu PMA eða PMMA, efna sem fyrir nokkrum áratugum voru oft kölluð „Dauði“ í heimi neytenda. Þau geta leitt til hjartsláttartruflana og jafnvel hjartastopps jafnvel þótt um tiltölulega litla skammta sé að ræða.

PMA-efni fundust nýlega hér á landi og óttast lögreglan því að þau séu komin í dreifingu meðal fíkniefnaneytenda. Að sögn Þórarins Tyrfingssonar á Vogi hafa menn ekki enn orðið varir við efnið þar.

Efnin eru gjarnan seld undir fölsku flaggi sem vinsælasta efnið hjá ungum neytendum, e-töflur, en PMA mun vera ódýrara í framleiðslu en e-töflur. PMA er seinvirkara og því er hætt við að fólk taki meira af því sem getur reynst lífshættulegt.