Vífilsstaðir mbl.is/Þorkell

Fasteignadeild Landspítalans gerir athugasemd við umfjöllun um ástand húsa á Vífilsstöðum og nýtingu þeirra. Deildin segir húsnæðið hafa verið vel nýtt undanfarin ár og reglulegt eftirlit sé með öllum húseignum spítalans á staðnum.

„Húsin standa alls ekki öll auð því Landspítali leigir Garðabæ leikskólahúsnæði Vífilsstaða og hefur gert um langt árabil. Þá leigir Hjallastefnan húsnæði á Vífilsstöðum og rekur þar skóla. Önnur hús á lóðinni sem eru íbúðarhús eru flestöll í útleigu,“ segir í athugasemdinni. 

Endurbætur á gamla yfirlæknishúsinu, sem skemmdist mikið vegna heitavatnsleka fyrir nokkrum árum, hefur þurft að bíða þar sem hún yrði mjög kostnaðarsöm og viðhaldsfé naum skammtað. Reynt er að varna því að ástand hússins versni frekar, og stendur til að mála það í sumar. 

Leigjendur hafa ekki fundist að húsnæði því sem hjúkrunarheimili Hrafnistu var í þangað til í fyrrahaust. „Nú hafa hins vegar aðilar í heilbrigðisstarfsemi lýst áhuga á að leigja húsið og er það til skoðunar, segir í athugasemdinni.