Herjólfur siglir nú aftur í Landeyjahöfn. Rax / Ragnar Axelsson

Þeir sem pantað höfðu með Herjólfi frá Þorlákshöfn í síðdegisferð í dag, t.d. með bíl, þurftu að víkja fyrir þeim sem áttu pantað með skipinu frá Landeyjahöfn. Herjólfur lagðist upp að bryggju í Landeyjahöfn nú síðdegis. Þangað hafði hann ekki komið síðan 12. janúar.

Mbl.is frétti af manni sem átti pantað far fyrir sig og bíl frá Þorlákshöfn í seinni ferðinni í dag. Þegar ákveðið var að sigla í Landeyjahöfn kom í ljós að pöntunin gilti ekki lengur. Þeir áttu forgang sem pantað höfðu far fyrir bíl frá Landeyjahöfn.

Guðmundur Petersen, rekstrarstjóri Herjólfs hjá Eimskip, sagði þetta vel geta staðist. Hann sagði að mikill ruglingur hafi orðið á áætlun skipsins vegna lokunar Landeyjahafnar. Þegar opnað var fyrir bókanir þangað var gert ráð fyrir fjórum ferðum í Landeyjahöfn á dag.

Þeir sem koma nú frá Vestmannaeyjum í Landeyjahöfn en eiga bíl í Þorlákshöfn verða fluttir þangað á kostnað Eimskips, að sögn Guðmundar. Þeir sem áttu pantað frá Þorlákshöfn, en komast ekki með bílinn frá Landeyjahöfn, geta væntanlega farið sjálfir með skipinu til Eyja. Bíllinn verður svo fluttur til Eyja um leið og pláss verður fyrir hann.

Mikið er bókað með Herjólfi um helgina. Blakmót öldunga verður m.a. haldið í Vestmannaeyjum og búist við um 1.000 keppendum. 

Guðmundur sagði að bæjarstjórn Vestmannaeyja og fleiri hafi óskað eftir því að strax yrði byrjað að sigla í Landeyjahöfn, þótt aðstæður séu þannig að einungis sé hægt að sigla þangað á flóði. Því fer Herjólfur tvær ferðir nú síðdegis í Landeyjahöfn og þrjár á morgun.

Áfram verður unnið að dýpkun Landeyjahafnar og er töluvert eftir, að sögn Guðmunds.  Hann reiknaði með að einhverjar takmarkanir yrðu á siglingu þangað vegna dýpisins næstu daga. Rif í hafnarmynninu er helsti þröskuldurinn.

„Við stöndum í þeirri trú að það sé búið að opna fyrir sumarið,“ sagði Guðmundur. Hann sagði að talsverður léttir fylgdi því að geta aftur siglt í Landeyjahöfn. Það séu búnir að vera erfiðir tímar og margir óánægðir því fólki þyki  mikill munur að ferðast í Landeyjahöfn vegna stuttrar siglingar miðað við Þorlákshöfn.

Þá hefur verið leiðinlegt sjóveður í allan vetur með tilheyrandi veltingi og sjóveiki á siglingarleiðinni milli Vestmannaeyja og Þorlákshafnar.