Búrfellsvirkjun. mbl.is/Ómar

Landsvirkjun og Skeiða- og Gnúpverjahreppur gerðu í dag með sér samkomulag um yfirtöku Skeiða- og Gnúpverjahrepps á sundlaug Landsvirkjunar í Þjórsárdal með öllum réttindum sem henni fylgja.

Samkvæmt upplýsingum frá Landsvirkjun var sundlaugin í Þjórsárdal upphaflega byggð skömmu fyrir 1980. Síðan þá hafa ýmis mannvirki sem tengjast rekstri sundlaugarinnar og starfsemi hennar verið byggð og endurbætt. Sundlaugin er í dag rekin og kostuð af Landsvirkjun.

Sundlaugin í Þjórsárdal er vestan Fossár milli Reykholts og Rauðukamba. Starfsmenn Landsvirkjunar á byggingartíma Búrfellsvirkjunar byggðu fyrsta grunninn að sundlauginni með því að grafa gryfju sem þeir fóðruðu með segldúk á meðan Búrfells-virkjun var í byggingu. Fljótlega fengu starfsmenn afgangssteypu frá Búrfellsvirkjun til að steypa laugina. Jarðvarmi var fenginn úr sjálfrennandi hver við laugina, með u.þ.b. 70° heitu vatni. Kalt vatn fæst með söfnun á vatni úr lindum í hlíðum ofan laugar. Heitt neysluvatn er fengið með upphitun á köldu vatni um spíral sem liggur í hvernum. Laugin tekur um 700 tonn af vatni.

Óbyggðanefnd hefur m.a. fjallað um sundlaug Landsvirkjunar í Þjórsárdal og í úrskurði nefndarinnar kemur fram að sundlaugin er skráð í fasteignamati og að Landsvirkjun sé hvorki eigandi landsréttinda né jarðhitaréttinda sem þar um ræðir en sé hins vegar eigandi mannvirkja. Skeiða- og Gnúpverjahreppur þarf því að semja sérstaklega við eigendur vatnsréttinda og lands um áframhaldandi nýtingu vatnsréttinda og lands á svæðinu. 

Hörður Arnarson, forstjóri Landsvirkjunar og Gunnar Örn Marteinsson, sveitarstjóri Skeiða- og Gnúpverjahrepps, skrifa undir samkomulagið.