Maðurinn fannst á Esjunni. hag / Haraldur Guðjónsson

Maðurinn sem leitað var að í Esjunni er fundinn. Hann mun hafa verið kominn yfir Laufskörðin og upp á Esjuna. Þyrla Landhelgisgæslunnar sótti manninn og flutti hann á sjúkrahús til aðhlynningar. 

Uppfært klukkan 20.25 og 21.00

Svohljóðandi tilkynning er á heimasíðu Landhelgisgæslunnar:

„Þyrla Landhelgisgæslunnar lenti kl. 20:06 við Landspítalann í Fossvogi með mann sem villtist við göngu á Esju. Var maðurinn heill á húfi en fluttur á sjúkrahús tl aðhlynningar.

Fjarskiptamiðstöð lögreglunnar óskaði kl. 18:52 eftir aðstoð Landhelgisgæslunnar við leitina. Fann þyrlan manninn kl. 20:01.“  

Svohljóðandi tilkynning barst frá Slysavarnafélaginu Landsbjörgu klukkan 20.13:

„Maðurinn sem leitað var að á Esju fannst heill á húfi núna rétt fyrir klukkan átta. Hann var þó illa áttaður og aðframkominn. Þyrla Landhelgisgæslunnar sem einnig tók þátt í leitinni sótti manninn og er hann núna á leið á bráðamóttöku Landsspítalans.

Hátt í 100 björgunarsveitarmenn tóku þátt í leitinni enda svæðið stórt og erfitt yfirferðar. Leitin gekk þó vel enda hreinsaði fjallið af sér í þann mund sem leitin hófst.“

Maðurinn var í símasambandi

Undanfarar og sérhæfðir leitarmenn úr björgunarsveitum Slysavarnafélagsins Landsbjargar voru kallaðar út til leitar að manni í Esju um klukkan 18.00 í kvöld.

Maðurinn var í símasambandi en var orðinn mjög þreyttur. Hann hafði ætlað að ganga á Móskarðshnjúka austast í Esju, þaðan yfir Laufaskörð og á hábungu fjallsins en villtist á leiðinni.

Björgunarmenn fóru að svæðinu bæði austan og vestan megin fjallsins. Sem fyrr segir fannst maðurinn fyrir klukkan 20.00 og var hann þá kominn upp á Esjuna. Hann hafði því lagt að baki Laufskörðin sem eru einstigi um brattar hlíðar.

Þyrla Landhelgisgæslunnar var kominn til leitar og því var hún fengin til að flytja manninn á Landspítalann í Fossvogi til aðhlynningar.