Reuters

Árni Finnsson, formaður Náttúruverndarsamtaka Íslands, segist ekki véfengja skýringar framkvæmdastjóra Hvals hf. sem hefur ákveðið að fresta hvalveiðum um óákveðinn tíma vegna ástandsins í Japan. Árni bendir hins vegar á að það geti verið að erfiðar markaðsaðstæður í Japan hafi haft sín áhrif.

Kristján Loftsson, framkvæmdastjóri Hvals, er nýkominn frá Japan þar sem hann kynnti sér ástand mála í kjölfar hamfaranna í mars. Hann ákvað að fresta hvalveiðum í ár, sem fyrr segir, og segir Kristján ennfremur að ákvörðunin verði endurskoðuð í ágúst. 

„Af þeim rúmlega 3.000 tonnum sem aflað hefur verið á vertíðunum 2009 og 2010 eru bara rúmlega 1.000 komin til Japans. Þannig að markaðsstarfið hefur gengið treglega líka,“ segir Árni í samtali við mbl.is.

Samtökin hafi ítrekað bent á að það sé erfitt að selja kjötið og fá það afgreitt í gegnum japanska tollinn.

„Við bentum á það strax 2009 og að þarna væri markaður sem væri í hnignun. Hvort það hefur verið afgerandi þáttur í þessari ákvörðun þori ég ekki að segja, en mér finnst ekki ólíklegt að það hafi haft sín áhrif,“ segir Árni og bætir við að tveir þriðju hlutar þess kjöts sem hafi verið landað sé enn á Íslandi, skv. síðustu tölum Hagstofunnar.

Árni Finnsson, formaður Náttúruverndarsamtaka Íslands.